Continuando coa súa labor formativa, o Concello de Tomiño organiza un curso de verán, para persoas adultas que queiran presentarse ás probas libres da ESO, que terán lugar no mes de setembro.

Durante este novo cursiño, que vén de comezar, as clases teñen lugar os luns, martes e xoves de 19:00 a 22:00 horas, na Aula CeMIT (Campo da Feira s/n) de Tomiño.

O pasado día 3, tivo lugar o comezo do curso de verán para preparar as probas da ESO. Aínda que o prazo de matriculación está pechado, quedan algunhas prazas dispoñibles no ámbito social, non así no científico nin no lingüístico.

Ata o día de hoxe hai 31 persoas matriculadas (14 mulleres e 17 homes). De todos os participantes, 18 xa se presentaron nas probas do pasado mes de xuño, conseguindo unha puntuación desfavorable, polo que se seguirán formando, para volvelo a tentar na proba do próximo 7 de setembro.

O bloque que ten máis demanda é o científico, cun total de 26 persoas matriculadas, seguido polo bloque lingüístico, con 20 persoas, e o de ámbito social, con 16 persoas.  

Os requisitos para a inscrición no curso son:

•     Estar empadroado en Tomiño.
•     Ter cumpridos vos 16 anos.
•     Tamén se poderán admitir persoas de fóra de Tomiño, se quedan prazas vacantes.
•     Ademais dos requisitos anteriores, será necesario:
•     Non estar matriculado oficialmente en ningún curso da ESO, en ningún centro educativo de Galicia.
•     Ter cumpridos os 18 anos antes do 7 de setembro de 2017.