A directora xeral de Comercio e Consumo, Sol Vázquez Abeal, participou  na entrega de premios da campaña Días azuis do comercio galego, que se celebrou do 16 ao 30 de xuño en toda a comunidade co obxectivo de dinamizar as vendas nos establecementos de proximidade e premiar a fidelidade dos seus clientes.

No acto, no que tamén participaron o presidente da Federación Galega de Comercio, José María Seijas, e o director da Rede Comercial de Abanca, Gabriel González Eiroa, entregáronse 16.000 euros en tarxetas prepago de 500, 300 e 150 euros, que previamente se sortearon entre todas as persoas que mercaron nos establecementos de proximidade durante a duración da campaña, na que se rexistraron preto de 70.000 participacións. Estas tarxetas, achegadas por Abanca, deberán ser utilizadas para comprar novamente no comercio de proximidade galego, durante todo o 2017.

 

A iniciativa forma parte do Plan Estratéxico de Impulso ao Comercio de Galicia da Xunta, no marco do cal se veñen de conceder apoios que mobilizarán preto de 2 millóns de euros na modernización dos mercados e o impulso do emprendemento

 

A iniciativa, impulsada pola Xunta e a Federación Galega de Comercio en colaboración coas federacións provinciais de comercio e as asociacións e centros comerciais abertos, ademais de Abanca, enmárcanse no Plan Estratéxico de Impulso ao Comercio de Galicia.

Dentro deste Plan, tal e como salientou Vázquez Abeal, véñense de conceder apoios que permitirán mobilizar preto de 2 millóns de euros na modernización e excelencia das prazas de abastos galegas, así como no impulso a novas iniciativas comerciais, coa posta en marcha de Espazos activos de emprendemento comercial no rural.