A mesa de contratación da Deputación de Pontevedra, presidida polo deputado, Carlos López Font, analizou hoxe a poxa realizada para a colleita de uva do Castelo de Soutomaior. A oferta presentada pola adega “Quinta das Eiras” foi a elixida pola mesa de contratación para a adxudicación dos case que 18.000 quilos que poderían recollerse nos próximos días.

En concreto a adega “Quinta das Eiras” presentou unha oferta de 1,008 euros por quilo de uva recollida, que agora, unha vez comprobada a totalidade da documentación,  será adxudicada por unha resolución do deputado delegado de Patrimonio, Carlos López Font. Con este proceso conclúese, un ano máis, o proceso de poxa pública para as uvas que produce a finca do Castelo de Soutomaior nas súas catro hectáreas dedicadas a este cultivo.

Dende o cambio de goberno na Deputación, en xullo de 2015 e baixo a presidencia de Carmela Silva, adoptouse o sistema de poxa pública para as uvas do castelo. En 2015 a colleita foi de 14.720 quilos  que vendeuse a un prezo de 0,98 euros por quilo. O ano pasado a colleita foi de 15.815 quilos e vendeuse a un prezo de 1,32 euros por quilo. Neste ano, a previsión é que a colleita sexa entorno aos 18.000 quilos pola boa calidade e cantidade da uva que presenta a explotación, aínda que  ate que adega non finalice os traballos de recollida non se terán os datos definitivos.  

Lembramos que o Castelo de Soutomaior, fortaleza da Idade Media que hoxe en día é patrimonio público, foi adquirido pola institución provincial no ano 1982 e os seus viñedos, que contan con catro hectáreas (o Castelo ten unha extensión de 33), datan do ano 1984.