A Coral Polifónica Ventos do Val, da mosense parroquia de Petelos, realiza ao longo do ano varios intercambios culturais atendendo a peticións das agrupacións que así llo solicitan.

Precisamente a pasada fin de semana, os días 1 e 2 de setembro, participou en Santander no VI Ciclo Coral Verán Musical 2017. O concerto de Ventos do Val incluído neste ciclo realizouse na Igrexa San Vicente da Maza de Guriezo, atendendo a unha petición do Coro de Cámara Gaudia Música (Escolanía de Guriezo Cantabria).

Xunto coa Coral Ventos do Val participaron a Coral Polifónica Santa María de Cueto (Santander) e a Coral Zozoak Abesbatza de Getxo (Bizcaia).

A Coral Ventos do Val, marcándose como obxectivo o de representar con orgullo ó municipio de Mos e cantar cancións do folclore galego  fóra da Comunidade Autónoma, desprazouse ata Santander onde foi moi ben recibida; xa que na capital cántabra atópase o Centro Galego que lembra a Galicia e a tódolos seus habitantes con moito agarimo.

O concerto que Ventos do Val ofreceu en Santander estivo composto de cancións galegas, habaneiras, xotas, boleros, zarzuelas, e cancións mariñeiras.