O pleno do concello de Salceda, debateu unha moción presentada polo grupo socialista, dirixida a Xunta de Galicia e a Deputación Provincial, para esixir a modificación do mapa de emerxencias provincial, co obxecto de rematar coas zonas de sombra da provincia que afecta a varios concellos.

Dende o grupo municipal socialista afirman que “é un tema de vital importancia, polo que é necesario o inicio inmediato dun diálogo coa Xunta de Galicia que leve á modificación do mapa de emerxencias provincial, para que non quede ningunha zona na que os bombeiros poidan tardar máis de 20 minutos en acudir a unha emerxencia”.

“No caso de Salceda de Caselas, que si se atopa no radio de actuación de 20 minutos, pode igualmente verse afectada no caso de darse a situación de incendios simultáneos no noso concello  e en algunha das zonas de sombra, como A Guarda ou A Cañiza. Por outra banda, “é necesario que teñamos un modelo de calidade e uniforme en todo o territorio provincial”, insiste a voceira Verónica Tourón.

A moción indicaba tamén que “a cidadanía de Salceda e a de toda a provincia pode chegar a estar indefensa ante un servizo de tan escasa calidade, en situacións nas que a diferencia entre a vida e a morte, radica en gran medida no tempo de resposta”.

As concelleiras socialistas fan fincapé na importancia deste tipo de iniciativas, xa que en todo o que incumbe ó mal funcionamento dos servizos de emerxencia hai que buscarlle solucións antes de que se dean circunstancias irremediables. Insisten en que seguirán levando iniciativas que melloren a calidade de vida dos veciños de Salceda, punto este que consideran fundamental na súa labor institucional.