O dispositivo de loita contra incendios mosense está integrado polo Servizo Municipal de Emerxencias, a Agrupación de Voluntarios de Protección Civil, unha brigada que comezou a operar o pasado 3 de xullo dotada de 14 traballadores e a nova brigada medioambiental que empezou a traballar o mes pasado e conta con tres traballadores máis.

A brigada de 14 traballadores que opera en Mos desde xullo foi contratada grazas a unha subvención de Medio Rural e está dotada de 4 operarios, 1 xefe de brigada e 9 condutores que estarán en activo ata finais do presente mes de setembro. Pola súa banda a brigada de 3 traballadores, 2 condutores e 1 operario, finánciase grazas a un convenio de colaboración coa consellería de Presidencia, Administracións Públicas e Xustiza e permarecerá traballando no Concello de Mos ata finais deste ano 2017 para que, ao rematar estes mes a outra brigada, o municipio non quede totalmente desprovisto deste servizo. Polo tanto Mos conta actualmente cun dispositivo de 17 traballadores adicados á prevención e extinción de lumes, que colabora activamente cos servizos municipais permanentes de Emerxencias e Protección Civil.

Todo este dispositivo realizou dende principios do pasado mes de xullo un total de 153 intervencións entre incendios forestais e outras emerxencias dos cales 50 foron incendios (48 forestais e 2 urbanos) e os 103 restantes foron intervencións varias.

Os incendios que foron extinguidos por este dispositivo producíronse dentro do propio termo municipal de Mos e noutras localidades veciñas entre as que se atoparon Vigo, Salceda de Caselas, O Porriño, Soutomaior, etc.

Entre as 103 intervencións varias realizadas nas que o dispositivo actuou atópanse accidentes e incidencias de circulación, animais soltos, salvamentos e rescates e outros. Ademais, a maiores de todas estas actuacións, realizáronse intervencións de carácter urxente en casos de niños de Vespa Velutina dentro do municipio de Mos.

Servizos prestados polo servizo de emerxencia municipal, entre o 1 de xullo de 2017 e o 7 de Setembro de 2017:

· Accidentes de trafico ..............................…: 35
· Incidencias na circulación ..........................: 26
· Salvamentos e rescates .............................: 1
· Incendios Forestais ....................................: 48
· Incendios urbanos ......................................: 2
· Recollida de animais ..................................: 20
· Operativos programados .............................: 4
· Outras incidencias ....................................: 17

O Concello de Mos iniciou o día 3 de xullo a súa campaña municipal contra incendios deste verán para a que a administración local contratou, grazas ós convenios asinados coas consellerías de Medio Rural e Presidencia, Administracións Públicas e Xustiza, un total de 17 traballadores.

Destes 17 traballadores, 14 estarán operativos ata que remate a tempada estival e os outros 3 ata final de ano, para realizar funcións de prevención e defensa forestal, reforzando o xa existente Servizo Municipal de Emerxencias e contando en todo momento coa colaboración dos integrantes da Agrupación de Voluntarios de Protección Civil de Mos.

A importancia deste dispositivo de loita contra incendios é vital, así como tamén o é a concienciación da cidadanía para intentar diminuír desde o primeiro momento o risco dun lume, xa que o monte é patrimonio de todos. De ahí a insistencia da administración local en potenciar a prevención, a vixilancia e disuasión para que os montes mosenses non sexan vítimas dos lumes.