O pasado día 4 de setembro preto 100 alumnos/as comezaron o curso 2017/2018 na Escola de Música de Xinzo, o cal rematará o 30 de xuño de 2018. O cadro de profesorado para este curso suma un total de 10 docentes que cubren tódalas especialidades musicais.

Este curso 2017/2018 contará con diversas novidades, entre as que destacan o estreo da imaxe oficial da propia escola de música, a programación dun curso de jazz e outro curso de iniciación á dirección bandística que se celebrarán na última semana de decembro, a organización dun festival de música de cámara polas rúas de Ponteareas na última semana de xaneiro, un curso de empalletado para gaita no mes de maio, o festival de Bandas Infantís no mes de Xuño, así como tamén a celebración no mes de marzo dunha nova edición dos concertos didácticos no auditorio Reveriano Soutullo para todos os colexios de Ponteareas.

No eido máis académico, a Escola de Música de Xinzo estrea neste curso novo funcionamento. A maioría das materias organizaranse en catro niveis de coñecementos co obxectivo de homoxeneizar a ensinanza musical, aumentando así a calidade docente e os resultados de aprendizaxe de todos os alumnos e alumnas.

Ademáis, a dirección da Escola de Música quixo introducir diversas actividades musico-lúdicas neste novo curso escolar para dinamizar e favorecer a ensinanza musical entre todo o alumnado. Destacan a organización da semana do Samaín, a de Santa Icía, a do entroido ou a de portas abertas, complementándose coas as audicións trimestrais correspondentes.

Outra das novidades deste curso 2017/2018 é a impartición de novas materias, como é a de “música tradicional”, que inclúe gaita, pandeiro ou pandeireta, ou a da formación dun coro. Segundo a palabra do Director da Escola de Música, Roberto Sánchez, “queremos facer unha aposta forte pola formación dun coro dirixido a persoas de tódalas idades, dado que na actualidade é unha das poucas carencias culturais e educativas que temos en Xinzo. Polo que animanos a que toda a xente que estea interesada se poña en contacto con nós para poder comezar cos ensaios no próximo mes de outubro”.

ESCOLA DE MÚSICA DE XINZO

Destaca tamén que a Dirección da Escola de Música de Xinzo no seu afán de seguir impulsando a formación musical entre toda a poboación do Concello de Ponteareas, está mantendo contactos con diversas Casas Culturais, co obxectivo de comezar a impartir ensinanzas musicais a nenos e nenas de 4 a 6 anos a través da materia de “música e movemento” de forma descentralizada nas diferentes parroquias de Ponteareas.

Por último, informar a todos os interesados/as que si desexan iniciarse nos estudos musicais na Escola de Música de Xinzo poden informase nos teléfonos 620 06 14 34 ou 655 29 65 76.