A Plataforma asegura que "ten como obxectivo mostrar o apoio desde Galiza ao proceso democrático catalán materializado nun referendo que o Estado español considera ilegal e pretende prohibir pola vía da forza policial, da persecución xudicial dos seus promotores e da suspensión da autonomía catalá pola porta de atrás, valéndose de subterfuxios para tentar controlar o goberno de Catalunya. Aínda sen recorrer formalmente ao artigo 155 da constitución española, que suspendería de iure a autonomía, os últimos pasos dados polo goberno de Madrid suspenden de facto as institucións de autogoberno catalás por apoiaren e daren forma á vontade maioritaria do pobo de Catalunya que nas últimas eleccións autonómicas votou conscientemente opcións políticas que tiñan claramente explicitado no seu programa a celebración dun referendo de autodeterminación".

 

Nun comunicado sinalan que "a imputación de máis de setecentos alcaldes e alcaldesas, as detencións de cargos eleitos, o envío masivo de efectivos de corpos policiais e a máis que previsible radicalización de todo este programa represivo con tal de impedir que a xente se exprese libremente nunhas urnas xa non causa perplexidade. Ao contrario, o que fai é confirmar o radicalismo antidemocrático do Estado".

Explican que "desde a Plataforma Galiza con Catalunya animamos a todo o pobo galego a participar nesta mobilización cívica contra ese estado prepotente que nega o dereito internacional básico  e a favor dun xornada de votación normalizada, tranquila e libre". Ademáis animan "tamén toda a comunidade galega emigrada en Catalunya a dar un Si á proclamación dunha República Catalá independente".