O Goberno local do Porriño quere rexeitar, de plano, as afirmacións do Grupo Municipal do Partido Popular sobre o novo Plan de Transporte da Xunta de Galicia e as "falsidades, manifestamente comprobábeis, nas que incorre o PP local".

"Falta completamente á verdade ao afirmar que o Goberno local amosou unha absoluta despreocupación” por este problema, coma di o Partido Popular, de feito, o 27 de xuño deste ano, a alcaldesa, Eva García de la Torre, explica que asinou, xunto cos alcaldes de Covelo, Mondariz Balneario, Mondariz, Ponteareas, Salceda e As Neves, un documento remitido á Dirección Xeral de Mobilidade- dependente da Consellería de Infraestruturas, na que alerta sobre as “consecuencias que terá a proposta da consellería nos usuarios do transporte público de viaxeiros”.

O Goberno local di que non pode "comprender o cinismo do Partido Popular do Porriño que nunha nota enviada aos medios de comunicación afirma que solicita que se restablezan as liñas e frecuencias afectadas coa implantación do novo Plan de Transporte no Porriño”: no mesmo documento do pasado mes de xuño, os alcaldes, entre outras propostas, piden á Consellería que “se manteñan os servizos de liña regular existentes ata que non exista un sistema alternativo eficiente de transporte público”.

No devandito documento, pídese á Xunta que o transporte chegue ás parroquias, que non se exclúa a sectores da poboación por idades ou que se leve a cabo unha reorganización horaria dos servizos.

Así mesmo, tamén sinalan que "é falso, como asegura o Partido Popular do Porriño, que o Goberno local nin se quera cubriu o formulario enviado pola consellería avaliando de maneira previa a implantación do Plan de Transporte no Municipio”.  "A Consellería de Infraestruturas, á fronte da cal está unha responsable do PP, desminte ao seu propio partido no Porriño: o cuestionario respostouse o día 7 de febreiro deste mesmo ano, hai preto de 8 meses" aseguran.

"O PP local non se axusta á verdade nin no que se refire á Xunta de Voceiros do Concello: logo desta xuntanza, o 20 de setembro remitiuse, dende a  Alcaldía, vía email, ao voceiro municipal do Partido Popular un borrador da nota de prensa proposta no nome de todos os grupos da Corporación, e a resposta do voceiro popular, o día 22 de setembro foi :'antes de enviar el comunicado de prensa, debemos solicitar a la Consellería de Infraestruturas la información necesaria acerca de las líneas actualmente existentes, paradas y horarios. Una vez conocidos estos datos, y si efectivamente no se cubren los servicios, entonces procederemos a enviar el comunicado conjunto y a reclamar a la Xunta que cubra las necesidades existentes en nuestro término municipal'”. sinalan dende o Concello

Para o Goberno local sorprende que o PP diga que pedirá na Xunta de Voceiros que se “restablezan as liñas e frecuencias afectadas, de xeito que os veciños e veciñas das parroquias porriñesas non vexan mermado o servizo de transporte público” e que, ao mesmo tempo, afirme que non as coñece e que ten que pedir á Consellería de Infraestruturas que concrete cales son esas liñas e frecuencias.

"Coma é posible que Partido Popular do Porriño estea a pedir que se recuperasen unhas liñas,  uns horarios  e uns percorridos que descoñecía?" pregúntanse

"Simplemente: non é posible porque o PP do Porriño o primeiro no que pensou foi nos intereses da conselleira e nos do seu partido non nos das veciñas e veciños, que ata hoxe presentaron no Concello, vía correo ordinario, correo electrónico, no Rexistro Municipal, en persoa ou por medio das redes sociais, ducias de queixas e reclamacións polos problemas, en moitos casos moi graves-coma falla de conexións, de liñas ou de autobuses que os deixen no seu traballo, nos seus centros de estudos ou no médico á hora necesaria- que están a padecer por dos cambios no transporte" dín.

Por último, no comunicado emitido dende o Concello do Porriño explican que "o Partido Popular do Porriño afirma que está a 'levar a cabo as xestións precisas para resolver as dificultades xeradas co novo Plan', Plan aprobado pola Xunta de Galicia, dirixida polo Partido Popular, e asegura que iniciou 'as xestións precisas para dar solución á problemática do transporte no Porriño': se cadra froito desas xestións debe de ser a negativa da conselleira de Infraestruturas a recibir á alcaldesa, Eva García de la Torre, coma pedirá a rexedora nunha carta urxente, á que deriva ao  Xefe Territorial da Consellería de Infraestruturas en Pontevedra" conclúen.