O fotógrafo Adrián Irago áchase ata finais de novembro en Mozambique retratando a vida no país e os proxectos alí apoiados polo Fondo Galego de Cooperación e Solidariedade, co fin de preparar unha exposición que logo xirará por municipios de toda Galicia para dar a coñecer esta realidade. A viaxe forma parte do premio da terceira edición de Imaxes con Fondo, certame que o reporteiro vigués gañou o pasado ano.

Desde que hai un par de semanas iniciara o seu periplo, Adrián Irago está a visitar algunhas das iniciativas de loita contra a pobreza cofinanciadas desde o ano 2001 en materia de educación, saúde ou abastecemento de auga. O Fondo Galego impulsou ata o momento unha decena de proxectos no país lusófono, que supuxeron preto de 300.000 euros de investimento e que na súa maioría se levaron a cabo coa Casa do Gaiato e a súa “irmá” a Fundação Encontro como parceiros locais, pero tamén coa colaboración de ONGD galegas ou do Programa das Nacións Unidas para o desenvolvemento (PNUD).

Na actualidade, estase a executar canda a Fundação Encontro unha intervención co deporte como ferramenta para previr doenzas e adiccións entre a mocidade. Tamén se está a traballar directamente co municipio de Nhamayábue para a construción de pozos de auga. Adrián Irago está a visitar estes e outros proxectos anteriores, coma o realizado con Ecos do Sur para reparar un centro educativo na contorna de Maputo ou o impulsado canda Arquitectura sen Fronteiras para mellorar as condicións sanitarias na provincia de Inhambane. O seu obxectivo recollerá ademais a actividade pesqueira, aspectos culturais, espazos naturais, etc.

 

O autor vigués atópase no país da África lusófona para captar coa súa cámara tanto os proxectos alí apoiados como instantáneas da vida cotiá

 

Adrián Irago, que traballou en medios locais durante varios anos, conta na súa andaina con galardóns coma o Premio Nacional de Fotoperiodismo da Asociación Nacional de Informadores Gráficos de Prensa y Televisión. Entre os seus traballos destaca a cobertura dos desafiuzamentos en Madrid de 2012, os incendios en Galicia de 2013 e a ruta das persoas refuxiadas en 2015, que o levou a percorrer Grecia, Macedonia, Serbia, Alemaña e Francia.

O Fondo Galego de Cooperación
O Fondo Galego de Cooperación e Solidariedade está integrado por 91 concellos e as deputacións de Pontevedra, A Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido máis de 150 proxectos en 25 países e promove numerosas actividades e materiais en relación aos desequilibrios Norte-Sur. Recoñecido como axencia municipal da cooperación galega, o Fondo Galego de Cooperación e Solidariedade chega en 2017 ao seu vixésimo aniversario.