O Goberno local de Porriño considera que "as manifestacións de veciñas e veciños pedindo un pediatra máis e a mellora do servizo de Pediatría do Centro de Saúde do Porriño que, como sinalan, está saturado, amais da mellora dos servizos sanitarios, é unha proba máis de que á Consellería de Sanidade non lle interesan os porriñeses e os considera cidadáns de segunda".

"O desprezo do Servizo Galego de Saúde é máis que inxustificábel: á promesa de facer un novo centro de saúde, anunciado polo anterior alcalde do Partido Popular e a, daquela conselleira de Sanidade, Rocío Mosquera, en xuño de 2015, coa cesión dos terreos por parte do Concello para edificar neles o mesmo, quedou en nada, mesmo son os porriñeses os que pagan a limpeza do solar, que é propiedade do Sergas, que está en estado de abandono" aseguran.

Sanidade "tampouco atendeu as demandas feitas dende o Concello e polos propios usuarios do centro de saúde, de que axeitase as súas instalación no verán cando houbo enfermos que mesmo sufrían mareos e esvaídos a causa da calor que achegábase aos 40 graos en moitas ocasións" afirman dende o Concello do Porriño.

Así mesmo, explican que "o conselleiro de Sanidade, Jesús Vázquez Almuiña, ignorou por completo a petición, aprobada polo Pleno do Concello do Porriño en xuño deste mesmo ano, dunha entrevista coa alcaldesa e cos representantes dos grupos municipais para que expuxesen as carencias e as necesidades urxentes dun Centro de Saúde que atendeu os primeiros seis meses deste ano a máis de 100.000 doentes veciños de Mos, Salceda e O Porriño".

Por último sinalan que "no que xa é unha burla a todos os porriñeses, en outubro, o Partido Popular presentase no Porriño os orzamentos da Xunta que contemplan 1.000.000€ de inversións en Mos, 500.000€ para un centro de saúde en Salceda, e 0€ de inversión no Porriño".

Dende O Goberno local din que "naquela presentación participou, sen reivindicar nada, o presidente local do Partido Popular, Manuel Alejandro Lorenzo, deu por boas as intencións do Goberno de Galicia de non atender nin unha soa das necesidades das súas veciñas e veciños, entre elas a dun novo centro de saúde para O Porriño, varias veces anunciado e publicitado polo Goberno local do que o señor Lorenzo formaba parte".