A Deputación de Pontevedra elevou esta semana as súas propostas sobre o funcionamento interno do Grupo de Traballo de Emerxencias formado pola Xunta, Fegamp e as catro deputacións para analizar as necesidades de mellora dos servizos de emerxencias e contra incendios na comunidade autónoma.

O deputado Carlos Font mostrou a súa satisfacción pola aceptación das propostas que a respecto do funcionamento deste grupo levaba a institución pontevedresa a esta segunda xuntanza. En concreto as propostas aceptadas son sobre o carácter deliberativo  e de análise de propostas sen posibilidade executiva como se pretendía nun inicio. Co cal este grupo de traballo só analizará as propostas para a súa elevación á Comisión Galega de Emerxencias que é quen ten a competencia de poñelas en marcha.

Ao respecto da aprobación das posibles propostas, Carlos López Font, subliñou que tanto a Xunta, Fegamp e deputacións aceptaron que sexa por maioría cualificada de tres quintos como se aproben os temas debatidos e sempre coa posibilidade de calquera entidade integrante do grupo de traballo podan emitir un voto particular.

"A máis importante das nosas aportacións tamén foi aceptada e se trata de que cando existan propostas que afecten directamente a un concello, de xeito individual se dea audiencia a ese concello e podan presentar as súas alegacións o que nos garante o respecto á autonomía local, e unha maior participación e implicación de todos os axentes involucrados nas emerxencias", destacou o deputado pontevedrés.

 

Precisamente para a próxima xuntanza do grupo de traballo chegouse o acordo de que cada parte poda traer as súas correspondentes propostas para a mellora dos servizos. Carlos López Font, manifestou o seu desexo de que a Xunta poña entón enriba da mesa a proposta "documentada e con informes técnicos da suposta comarcalización porque ate de agora so coñecemos a súa intención pero sen ningún tipo de dato nin análise técnicos que nos permita valorala. Ate este intre a comarcalización non é máis que unha palabra sen maior contido". "Quero pensar –concluíu Font- que en decembro poderemos contar con ese informe técnico sobre os parques de emerxencias das grandes cidades e, o máis importante, coa opinión dos seus alcaldes sobre a comarcalización dos mesmos"

 

Font insistiu en que "o único que queremos é que todos fagan os seus deberes como xa fixo a Deputación de Pontevedra cos seus informes técnicos sobre as zonas de sombra e a necesidade de implantar un sistema de isocronas para a mellora da xestión que xa presentou ante a Comisión Galega de Protección Civil e o propio Consorcio Provincial de Pontevedra Contra Incendios, do que forman parte a propia Deputación e a Xunta de Galicia. "A Deputación de Pontevedra –continuou o deputado provincial- fixo un traballo serio baseado en informes técnicos sobre a mellora do servizo de emerxencias na provincia e o presentamos naqueles organismos onde se deben analizar antes da creación deste grupo de traballo".