A presidenta da Deputación de Pontevedra deu a coñecer a consecución dun novo distintivo de calidade para as oficinas de Turismo Rías Baixas. Neste caso, o Instituto para a Calidade Turística Española vén de conceder a "Q" de calidade á oficina de turismo do Aeroporto de Peinador, xestionada polo organismo provincial, así como de renovar os que xa se tiñan acadado para as oficinas do Palacete das Mendoza e do Mosteiro de Armenteira.

Segundo destacou Carmela Silva "para nós, a consecución dunha Q de calidade máis, neste caso para a oficina de turismo de Peinador, e a renovación dos outros dous distintivos supón unha manifestación clara de que o esforzo que estamos a impulsar en materia de calidade ten a súa recompensa".