Dar a coñecer a fronteira entre Galicia e Portugal, a máis antiga de Europa, é o obxectivo da axencia turística Volta Montana coa súa ruta ‘Fortalezas enfrontadas’, que conectará Tui e Valença do Minho este sábado 3 de febreiro.

Aínda que hoxe é unha das rexións con maior mobilidade da Península Ibérica, este territorio fronteirizo foi escenario de numerosas disputas ao longo dos séculos. De xeito entretido, esta ruta pretende achegar a todos os públicos os segredos dun lugar tan próximo pero descoñecido para moitos.

Trátase dunha ruta de dificultade baixa e dirixida a todos os públicos, incluídos nenos, cunha lonxitude de tan só 6,5 quilómetros nos que os asistentes poderán coñecer dous países, dúas culturas diferentes pero moi ligadas. O percorrido comeza nunha das beiras do río Miño, en Tui, coñecendo a catedral e as murallas desta localidade, para continuar atravesando a ponte internacional que une ambos países e rematar na fortaleza de Valença.

A ruta ten o seu inicio na praza Frei Rosendo Salvado de Tui ás 10.00 horas, para culminar en Valença ás 14.00 horas. Os interesados poden atopar máis información na web www.voltamontana.com.