O PSdeG-PSOE de Ponteareas e a súa Secretaria Xeral, Chus Garrote, asistirán aos diferentes actos con motivo do Día Internacional da Muller, secundando a mobilización e os paros promovidos polos sindicatos UGT e CC.OO. A Tenente de Alcalde e Secretaria Xeral das socialistas de Ponteareas, Chus Garrote, sinalou que “o obxectivo é a eliminación da discriminación laboral, económica e social das mulleres. Ademais, Chus Garrote engade que “non desistirá en traballar para que Ponteareas sexa un referente da igualdade entre homes e mulleres”.

As socialistas de Ponteareas reiteramos o noso compromiso activo pola eliminación da discriminación laboral, económica e social das mulleres. Para iso, o PSOE acaba de tramitar unha Proposición de Lei no Congreso dos Deputados co fin de acadar a igualdade salarial efectiva entre homes e mulleres. “Todos os avances en materia de igualdade de xénero teñen os selo do PSOE” Sinala Chus Garrote.

As socialistas de Ponteareas recordamos que somos o único partido de Ponteareas cunha muller ao mando da súa formación política e onde as súas concelleiras ocupan postos de responsabilidade no Goberno Municipal de Ponteareas, un feito que nos enche de orgullo. Chus Garrote: “O Partido Socialista rompeu moitas barreiras e non permitiremos que o PP “cronifique” as desigualdades entre homes e mulleres”.

Con motivo do Día internacional da Muller, as socialistas de Ponteareas estaremos apoiando os diferentes actos conmemorativos e reivindicativos do 8 de marzo. Chus Garrote estará o martes 6 ás 12:00h de marzo no acto “Mulleres en acción. Violencia Zero” que organiza a Deputación de Pontevedra na Praza Maior de Ponteareas, e o xoves 8 asistirá a convocatoria de folga e á concentración que se realizará as 12 horas na Praza Bugallal.