os servizos sanitarios de urxencia evacuaron esta mañá a unha moza que resultou ferida a causa dunha persiana que se desprendeu na Rúa García Lorca, en Vigo.

Segundo indicaron os profesionais do 061-Urxencias Sanitarias, a ferida foi trasladada ao Hospital Povisa para ser atendida das feridas provocadas nun brazo e nunha perna por unha persiana que lle caeu enriba cando atravesaba a rúa en Vigo.

Foi un viandante quen telefonou ao 112 Galicia sobre as dez da mañá para informar e indicou que, pese ás feridas, a muller atopábase consciente.

Ademais, na Coruña, restos dunha fachada caeron sobre algúns vehículos estacionados na Rúa Francisco de Asís, á altura do 34.

O particular que alertou ao 112 Galicia, sinalou que non había persoas afectadas, pero si certo risco de que seguisen caendo restos.

Así, desde o Centro Integrado de Atención ás Emerxencias (CIAE) pediuse a colaboración dos bombeiros da cidade e dos axentes de seguridade local.

Tamén no Porriño houbo desprendementos dun tellado na Rúa Progreso, que tampouco causou danos persoais, aínda que si obrigou a acoutar a zona para evitar máis riscos.

Por último, indicar que, en Ames,  cortouse unha pista por mor da enchente do río Tambre ao paso pola Praia Fluvial de Tapia.

Cómpre salientar que o CIAE 112 atendeu durante esta mañá varias incidencias relacionadas co episodio meteorolóxica adverso de vento que está a afectar a Comunidade galega.

A maior parte das incidencias producíronse pola caída de árbores, carteis, postes eléctricos, cables e restos de tellados e fachadas.