Galicia lidera, dentro de España, a execución dos fondos europeos do Programa de Desenvolvemento Rural (PDR) para o período 2014-2020. A nosa comunidade acadou o 69,02% do gasto público total do Feader desde o inicio do presente exercicio, contemplando os pagos entre o 16 de outubro de 2017 e o 28 de febreiro de 2018. O exercicio fiscal destes fondos prolóngase ata o vindeiro 15 de outubro.

Mentres, a media estatal representa o 39,12% (os pagamentos realizados ata o de agora no conxunto de España acadan os 734,97 millóns de euros, fronte a unha previsión media, para o período 2014 a 2020, de 1.878,86 millóns). No ranking español, tras Galicia atópanse Navarra (cun 66% de execución), Baleares (con case o 48%), Cataluña (45,6%) e Asturias (preto do 45% executado).

Por medidas, destacan os pagos correspondentes á de investimentos en activos físicos, que representan no conxunto do Estado preto do 29% do total, seguida da de agroambiente e clima, que supoñen case o 14% do total e da de investimentos para o desenvolvemento de zonas forestais e para viabilidade dos bosques, que chega ao 12,3% do total executado.

 

Con estas achegas foméntase a competitividade da agricultura galega mediante a modernización das explotacións agrícolas e forestais, a incorporación de agricultores mozos, a ordenación do territorio e a mellora da produtividade da industria agroalimentaria e forestal

 

Estes fondos do PDR serven tanto para financiar os avances nas reestruturacións parcelarias como para fomentar a incorporación de mozos á actividade agraria ou para inxectar investimentos en melloras de explotacións agrícolas. Así mesmo, apóiase a modernización e mellora da industria agroalimentaria, a promoción de produtos de calidade, o fomento da agricultura ecolóxica, o ámbito forestal ou o mantemento da actividade agraria en zonas con limitacións naturais, entre outras medidas.

Aposta polo agro
A execución dos proxectos financiados polo PDR amosa, pois, a aposta da Consellería do Medio Rural e, por conseguinte, da Xunta de Galicia polo agro galego. En concreto, búscase fomentar a competitividade da agricultura galega mediante a modernización das explotacións agrícolas e forestais, a incorporación de agricultores mozos en explotacións orientadas ao mercado e con capacidade de diversificación económica, a ordenación do territorio e a mellora da produtividade da industria agroalimentaria e forestal promovendo a produción de alto valor engadido.

Ademais, entre os obxectivos do PDR está tamén o de conservar e revalorizar o patrimonio natural de Galicia, promover a xestión sostible dos recursos naturais e a loita contra o cambio climático. E, como fin último, perséguese a mellora da calidade de vida da poboación rural fomentando a prestación de servizos básicos que axuden á fixación da poboación no medio rural, a creación de emprego e a redución do risco de pobreza.