Ante a nota de prensa emitida por GañaMos sobre o que eles denominan “a mala situación económica do Concello de Mos” a alcaldesa mosense, Nidia Arévalo, lamenta “ter que aclarar unha vez máis as informacións falsas publicadas polos membros deste grupo que son froito da súa mala intención por unha banda e da ignorancia e o descoñecemento, por outra”. “Menos mal que non gobernan o Concello de Mos”, afirma Nidia Arévalo, porque vista a falta de coñecemento demostrada, se o fixeran sería un auténtico desastre”. A rexedora local voltou a empregar a frase “ladran Sancho, señal de que cabalgamos”, ante este "novo ataque totalmente infundado de GañaMos".

Arévalo destacou en primeiro lugar que “dende esta Alcaldía e en xeral dende o equipo de goberno municipal, téñense sempre en conta todos os informes emitidos polos técnicos municipais, incluídos, por suposto, os de Tesourería”. E en segundo lugar advertiu a GañaMos de que “deixen de acusar en falso e dende o descoñecemento, xa que as arcas do Concello de Mos non se atopan en ningunha situación alarmante. O que sucede nestes intres, que é normal e habitual en todas as administracións públicas -dándose xeralmente nos períodos de inicio e peche de exercizo económico-, é que a liquidez vese puntualmente afectada polo desfase entre o ritmo de ingresos e de pagos, xa que o fluxo de ingresos depende do cobro de subvencións e actualmente faltan moitas subvencións pendentes de ingresar. En total, entre a Deputación de Pontevedra e a Xunta de Galicia, están pendentes de ingresarnos máis de 1 millón de euros en axudas”.

Dende o Concello de Mos "estase a traballar para tentar axilizar ó máximo a percepción das subvencións xustificadas, calculando que se poida producir nas próximas semanas e así equilibrar o ritmo entre os ingresos e os gastos municipais" sinalan.

“En calquera caso” sentenciou a alcaldesa mosense “os importes referenciados por GañaMos en nota de prensa son totalmente falsos e probablemente inventados, porque por parte dese grupo nin se solicitaron nin se consultaron expedientes relativos ao departamento de Tesourería”.