O CEIP Humberto Juanes de Nigrán será dende hoxe luns 16 ao venres 27 de abril un dos primeiros colexios de toda Galicia en acoller ‘El juego de la serpiente’, unha campaña europea para propiciar o transporte sostible que chega ao municipio da man da Policía Local de Nigrán e a Dirección General de Tráfico (DGT).

Este xogo implicará a todo o alumnado do centro e aos seus pais para animarlles a ir ao colexio camiñando, en bicicleta, en transporte público ou compartindo o coche entre varios. Ademáis de reducir as emisións de CO2, busca romper as percepcións negativas de moitas familias, como a preocupación pola seguridade dos nenos, e mostrar que as formas sustentables de mobilidade son tamén as máis divertidas e saudables. O motivo de realizarse no Humberto Juanes é que se trata dun centro ubicado en pleno casco urbano de Nigrán e que desde este ano conta con roteiros seguros ao ter habilitado o Concello beirarrúas en toda a contorna.

Así, durante as vindeiras dúas semanas, cada vez que os alumnos utilicen un modo de transporte sustentable nos seus desprazamentos ao cole (andando, en bicicleta, usando o transporte público ou compartindo coche), pegarán adhesivos nun colorido póster que representa unha serpe chamada Travis. O obxectivo final é cubrir completamente a serpe coas pegatinas cumplindo o reto particular do centro de incrementar un 15% os transportes sostibles, polo que dende o primeiro día, os axentes da Policía Local xunto ao profesorado realizarán unha enquisa para coñecer os progresos do alumnado.

 

Tódalas mañás profesorado e axentes da Policía Local avaliarán o método de transporte empregado polos nenos e, canto máis sostible sexa, máis pegatinas recibirán para poder completar o debuxo da serpe

 

“O xogo busca reducir as emisións de CO2 e tamén afianzar a idea de que é seguro e saudable ir ao colexio a pé. Ademais, os nenos empatizan coa figura do axente local e, a través deles, achegamos o aprendido aos seus pais”, reflexiona o inspector xefe da Policía Local de Nigrán, José Manuel Vázquez. "O CEIP Humberto Juanes conta cun roteiro seguro para os escolares, que poden desprazarse por beirarrúas dende o centro do municipio e dende a zona de aparcamento ao propio colexio. Levamos xa cinco anos recibindo clases de educación vial por parte da Policía Local de Nigrán e os alumnos están moi concienciados neste eido", sinala Cristina Fernández, directora do Humberto Juanes. “É un xogo que reforzará o proxecto do goberno local creado para ter unha contorna máis amigable, accesible e na que o peón sexa o protagonista sen sentirse ameazado por outros medios de transporte”, sinala o alcalde, Juan González.

‘El juego de la serpiente’ comenzou como un proxecto pequeno en Flandes (Bélxica) e aos poucos foi crecendo ata converterse nunha vasta campaña europea, na que participan centos de escolas en diferentes países. Os datos mostran que o xogo aumenta o número de viaxes á escola en modalidades sustentables e que reduce as emisións de CO2.

Clases educación vial
Por outra banda, durante o mes de maio e como en cada curso escolar, a Policía Local de Nigrán impartirá clases de educación vial nos diferentes centros educativos do municipio. Trátase de clases teóricas e prácticas completamente coordinadas, deseñadas e impartidas desde a Policía Local coa colaboración de DGT, que cede os recursos para un circuíto. Mantense así un traballo que este corpo iniciou no curso 2013/2014 impulsado polo propio inspector xefe José Manuel Vázquez á súa chegada a Nigrán (anteriormente facíao a DGT co apoio dos axentes locais).