A Deputación de Pontevedra vén de abrir o prazo para anotarse no “Obradoiro de Xestión Cultural con Perspectiva de Xénero” que será impartido por Concha Hernández, directora do Centro Conde Duque en Madrid e do Festival “Ellas Crean” o vindeiro 9 de maio no Edificio Administrativo da institución provincial dentro da programación da Escola de Igualdade María Vinyals. O obradoiro enmárcase na iniciativa “Tempadas de Igualdade nas Artes Escénicas”, promovida pola asociación “Clásicas y Modernas”, ás que está adeherida a Deputación “para situar á provincia como un motor de cambio do panorama actual da creación cultural no Estado”, tal e como asegurou a súa presidenta.

A encargada de impartir o “Obradoiro de Xestión Cultural con Perspectiva de Xénero”, Concha Hernández, dirixe o Centro Cultural Conde Duque en Madrid, un espazo con programación e actividades permanentes centradas na loita pola igualdade, en todos os eidos da xestión. Tamén dirixe o festival “Ellas Crean”, que celebrou xa a súa décimo cuarta edición, e está considerado pioneiro na procura da igualdade no mundo da cultura.

A actividade desenvolverase o 9 de maio entre as 12 e as 14 horas e entre as 16 e 18 horas no Edificio Administrativo da Deputación e está dirixida, principalmente, a técnicas e técnicos dos concellos, operadoras e operadores, así como a todas as persoas encargadas da programación e comunicación nos espazos culturais e de Igualdade.  As persoas interesadas poden inscribirse na web www.depo.gal (https://www.depo.gal/escola-de-igualdade-maria-vinyals/tempadas-de-igualdade/obradoiro-xestion-cultural-con-perspectiva-de-xenero) e cubrir o formulario.

O mesmo día, 9 de maio, tamén terá lugar ás 10 de mañá no Pazo provincial a sinatura da carta de apoio por parte da Deputación de Pontevedra ás “Tempadas de Igualdade nas Artes Escénicas” e Mariana Carballal, actriz e profesora de Interpretación da ESAD de Galicia, xunto á presidenta da Deputación, encargaranse de presentar a proposta aos concellos.

En liñas xerais, “Tempadas de Igualdade nas Artes Escénicas” é unha iniciativa de carácter altruísta centrada no impulso do papel da muller na cultura. A través dela preténdese instar ás estruturas de produción e difusión e axentes culturais a poñer en práctica os principios de igualdade de xénero, propoñer unha folla de ruta e ofrecer a colaboración experta para a igualdade na cultura. Neste contexto, a presidenta provincial subliñou que “o ámbito da cultura presenta grandes desigualdades e é preciso apostar con recursos e proxectos para facer un cambio na sociedade e poñer en marcha boas prácticas como esta para acadarmos un mundo máis xusto”.