“Elisa e Marcela” conta cunha importante presenza de actrices e actores galegos que interpretarán personaxes cun peso significativo na historia. Zenit TV confirmou os nomes dos seguintes membros galegos do reparto: María Pujalte interpretará á nai de Marcela.

María Pujalte interpretará á nai de Marcela.Sara Casa

snovas dará vida a Ana, a filla de Marcela.

Tamar Novas, no papel de Andrés, pretendente de Marcela.

Roberto Leal interpretará ao cura de Dumbría.

Manuel Lourenzo, como Víctor Cortiella, o párroco que oficiou a voda.

Luísa Merelas dará vida a unha monxa cega.

Mariana Carballal, no papel da profesora de historia.

Cova Verdiñas e Elena Seijó serán as veciñas de Elisa e Marcela.

Ademais do reparto principal, outros 16 actores galegos interpretarán personaxes con aparicións esporádicas, tamén coñecidos como “pequenas partes”. Zenit TV anunciará os seus nomes nas próximas semanas.

Así mesmo, a produción contará cun total de 140 figurantes galegos, que serán seleccionados ao longo do mes de maio.

Os papeis protagonistas de Elisa e Marcela serán interpretados por Natalia de Molina e Greta Fernández, respectivamente.

O filme, producido conxuntamente por Zenit TV, “Rodar y Rodar” e “Lanube Películas”, mobilizará un importante número de medios técnicos e artísticos galegos, xa que máis da metade da gravación terá lugar na nosa comunidade. O interese de Zenit TV por levar á televisión a conmovedora historia de Elisa e Marcela remóntase a hai máis dunha década.

Apoio da AGADIC e da TVG

“Elisa e Marcela” recibe o apoio económico da Axencia Galega das Industrias Culturais (AGADIC), órgano dependente da Xunta de Galicia, e do ICEC (Institut Català de les Empreses Culturals). Son coprodutoras do filme a Televisión de Galicia, Televisió de Catalunya, Canal Sur e a plataforma dixital Netflix. Tamén se emitirá na Televisión Canaria, en Castilla-La Mancha Televisión e en Aragón Televisión, e estase a negociar con outras canles da FORTA.

Próximos pasos

Zenit TV comezou a busca de actrices e actores para pequenas partes e figuración en marzo, proceso que se prolongará ata maio. A rodaxe desenvolverase ao longo dese mesmo mes, primeiro en Cataluña e despois en Galicia. A postprodución realizarase entre xuño e outubro, de modo que a copia definitiva do filme poida estar lista en torno ao mes de novembro.