O delegado da Xunta en Vigo, Ignacio  López-Chaves, xunto ao alcalde da Entidade Local Menor de Chenlo, Alejandro Lorenzo, participou onte nunha actividade con  escolares do CEIP Antonio Palacios que consistiu na plantación de distintas especies arbóreas en Chan Dacarreira.

O alumnado do colexio porriñés conmemorou así o Día da Árbore e tivo a oportunidade de aprender da man dos técnicos forestais datos importantes sobre as especies que ían plantar na contorna do campo de fútbol de Chenlo. Esta actividade organizada pola Entidade Local Menor en colaboración coa Consellería de Medio Rural da Xunta de Galicia serviu aos cativos para reflexionar sobre a necesidade de coidar os bosques.