A alcaldesa de Mos, Nidia Arévalo, a concelleira mosense de Urbanismo, Julia Loureiro, e a secretaria, xurídico e arquitecto municipais reuníronse esta semana no salón de actos da Axencia de Colocación con preto dunha vintena de empresarios do Polígono A Portela en Puxeiros por solicitude dun deles.

O motivo da xuntanza foi o de informar ao empresariado de A Portela dos pasos a seguir para mellorar e desenvolver o Polígono, xa que este se atopa en solo urbano non consolidado.

Representantes e técnicos municipais explicáronlles aos interesados o procedemento a levar a cabo para desenvolver o Polígono e que consiste na elaboración conxunta, e previo acordo dos empresarios, dun Plan Especial, que sería tramitado pola Xunta de Galicia e aprobado, en última instancia, por parte do Concello de Mos.

Unha vez aprobado este Plan Especial, procedería a constitución dunha Xunta de Compensación e a posterior elaboración dun proxecto de reparcelación e dun proxecto de urbanización para completar o trámites necesarios neste proceso.

Se finalmente se leva a cabo este procedemento, o Polígono A Portela, agora solo urbano non consolidado, podería ser dotado de servizos (máis e mellores que os actuais), mellorando a edificabilidade e o aproveitamento das parcelas. De ser así, cabería a posibilidade de que os empresarios puideran realizar ampliacións nas súas naves, etc. algo que agora é inviable ao non poder concedérselles licenzas a tal fin por tratarse de solo urbano non consolidado.