A Presidenta da Deputación de Pontevedra, Carmela Silva, anunciou recentemente que a Xunta de Goberno da institución provincial vén de aprobar unha nova convocatoria do Plan de Práctica Laboral para que 400 persoas acaden unha primeira experiencia laboral “en empresas, corporacións sectoriais e organizacións non gobernamentais”, sinalou.

Trátase, polo tanto, de 400 bolsas que teñen a finalidade de “que mozas e mozos con titulación universitaria ou de FP sen experiencia laboral previa no ámbito dos seus estudos, poidan promover e completar a súa formación académica en áreas de coñecemento ou actividades que poidan facilitar a súa futura incorporación ao mercado laboral”. 360 das bolsas destinaranse a empresas privadas e, as 40 restantes, a corporacións sectoriais e organizacións non gobernamentais.

A Xunta de Goberno da Deputación de Pontevedra aprobou  as bases “que regulan as condicións polas que se rexerá a convocatoria pública, en réxime de concorrencia competitiva, da selección e distribución destas 400 bolsas” que se retribuirán con 740 € para as persoas con ciclo superior de FP e con 840 € para as que posúan titulacións universitarias, aumentando as cantidades respecto á anterior convocatoria (igual que no caso do Plan de Práctica Laboral na Deputación e os concellos) e situando o investimento nun total de “4.221.984 €, dos cales 703.664 se corresponden coa anualidade 2018 e, 3.518.320 euros, co exercicio 2019”.

 

Carmela Silva sinalou que, xunto coa convocatoria de bolsas destinadas á Deputación e os concellos, o orzamento total se eleva a máis de 6 millóns de € para 600 bolsas

 

Carmela Silva resaltou que “se sumamos os máis de 2 millóns de euros que destinamos ao mesmo plan pero nos concellos da provincia e na Deputación” –o prazo de presentación de solicitudes para as persoas interesadas en gañar unha das 200 bolsas de práctica laboral na Deputación e os concellos segue aberto ata este luns 7 de maio–, “falamos dun total de 6.221.984 euros destinados a facilitar a inserción laboral, tanto na empresa privada como na administración pública, de 600 persoas”. Isto supón “313.000 € máis que o ano anterior”, informou, o que se traduce nun 5,3%.

As empresas que desexen formar parte desta convocatoria deben dispoñer de capacidade técnica e de xestión suficiente para executar os proxectos formativos de práctica laboral solicitados, estar inscritas no rexistro público correspondente, ter a sede social ou centro de traballo en Pontevedra, non despedir de forma improcedente a ningunha persoa traballadora da empresa da mesma titulación ou que realizara tarefas semellantes ás que realizará a persoa bolseira nos seis meses anteriores á data de finalización do prazo de presentación de solicitudes, asumir o compromiso de non extinguir contratos laborais vixentes ao persoal da mesma titulación, deseñar un proxecto ou programa formativo da práctica laboral, dispoñer de persoal técnico cualificado que se encargue da titoría ou non ter asignada na actualidade unha bolsa dos plans de práctica laboral da Deputación de Pontevedra. As empresas interesadas deberán preinscribirse en liña a través de www.depo.gal e presentar o xustificante electrónico xerado durante a preinscrición no Rexistro da Deputación coa documentación correspondente.  O prazo de presentación de solicitudes será de 20 días naturais contados a partir do día seguinte ao da publicación da convocatoria no BOPPO.