Unha vez máis os socialistas de Salceda poñen o foco na "deficiente situación da educación en Salceda, despois de que o goberno da Xunta de Galicia anunciase unha ampliación do CEP Altamira" que Verónica Tourón tilda de “totalmente insuficiente”.

Comunican as concelleiras socialistas que "na xuntanza que se celebrará o 1 de xuño ás 20:30 horas no Centro Social A Devesa, informarán sobre a ampliación do CEP Altamira, o comedor, as necesidades das escolas unitarias ou que vías teñen as mozas e mozos de Salceda ó rematar a ESO".

Na reunión estará presente o Deputado e Vicepresidente da Comisión de Educación no Congreso dos Deputados, Guillermo Meijón.

A reunión é aberta e convidan a participar na mesma a todos os veciños e veciñas en xeral. “É moi importante que as familias coñezan a situación real na que estudan os nosos nenos e nenas e a que se van atopar no comezo do novo curso escolar”.