A Consellería de Medio Ambiente e Ordenación do Territorio publicou no Diario Oficial de Galicia (DOG) a Resolución pola que se determinan as datas que da tempada de caza 2018-2019, así como as medidas de control por danos e os réximes especiais por especies. Deste xeito, a nova tempada de caza abarca o período comprendido entre o 1 de agosto ata o 31 de xullo de 2019.

Así, a Dirección Xeral de Patrimonio Natural establece como período hábil para exercer esta práctica, válido con carácter xeral, vai desde o 21 de outubro de 2018 ata o 6 de xaneiro de 2019, considerándose días hábiles de caza, con carácter xeral, os xoves, domingos e festivos de carácter estatal e autonómico; coas excepcións que para cada especie se sinalan no Título V da resolución.

Tal e como se establece na Resolución, a norma regula os períodos hábiles de caza, as especies sobre as que se poderá exercer a práctica cinexética, os métodos autorizados e as limitacións xerais ou particulares que afectarán ao exercicio desta actividade na Comunidade Autónoma durante a próxima tempada 2018-2019.

Unha das novidades que recolle a nova tempada de caza é que se amplía o período hábil para a captura de xabaril, respecto da tempada anterior, ao concluír o 3 de febreiro de 2019; mentres que na tempada anterior rematou o 14 de xaneiro de 2018. Así, o período hábil para a caza de xabaril establécese como sigue: en terreos de réxime cinexético especial do 25/08/2018 ata o 03/02/2019 xoves, sábados, domingos e festivos. En terreos de réxime cinexético común do 25/08/2018 ata o 31/08/2018 e do 07/01/2019 ata o 03/02/2019 os xoves, sábados, domingos e festivos, e do 01/09/2018 ao 05/01/2019 unicamente os sábados.

 

Unha das novidades da nova tempada é que se amplía en máis de 15 días o período hábil para o xabaril, que se estende ata o 3 de febreiro

 

Outra das novidades que se recollen para a nova tempada, destaca a normalización dun total de 15 procedementos administrativos recollidos na resolución. A finalidade é axilizar a tramitación, así como a comunicación aos solicitantes. Na seguinte táboa indícanse os procedementos modelizados, así como a entidade que resolve:

Preferiblemente, as solicitudes presentaranse por vía electrónica a través do formulario normalizado dispoñible na sede electrónica da Xunta de Galicia, https://sede.xunta.gal. Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

De acordo co establecido na nova normativa que regula o procedemento administrativo, para as persoas xurídicas, as entidades sen personalidade xurídica e as persoas representantes dunha das anteriores, a presentación electrónica será obrigatoria.