O deputado de Cooperación, David Regades, asistiu o pasado día 16 en Salceda de Caselas á inauguración da área recreativa de Rubás, unha actuación financiada a través do Plan Concellos da Deputación de Pontevedra cunha achega de 45.169,03 euros. O obxectivo do proxecto foi recuperar unha zona pública para usos recreativos, aproveitando os elementos naturais existentes, realizando traballos de acondicionamento do terreo e introducindo as obras necesarias para un mellor aproveitamento do espazo.

O Plan Concellos da Deputación destinou o ano pasado a Salceda de Caselas preto de 640.000 euros. Neste ano, a institución provincial incrementou a contía aportada nun 75,4 %, polo que ten posto a disposición deste municipio algo máis de 1,1 millón de euros.