A Asociación de Familiares de Enfermos de Alzheimer e outras Demencias de Galicia, AFAGA, concretamente unha psicóloga especializada no desenvolvemento de programas de intervención social, está a impartir no Centro de Día de Petelos un obradoiro de memoria a 11 maiores mosenses, titulado “Cultiva a Mente”.

O programa comezou o xoves 10 de maio deste ano e as sesións lévanse a cabo todos os xoves de 11:00 a 13:00 horas (2 horas de duración). O programa “Cultiva a Mente” nace como un proxecto que engloba a prevención da demencia e a promoción de hábitos saudables a nivel cognitivo e emocional. “Cultiva a Mente” é propiamente un taller de metacognición, que reúne exercicios de estimulación cognitiva, con todo, a presentación destes contidos non supón unha mera subministración de tarefas que deben ser executadas pola persoa a modo de programa de adestramento co fin de que mellore a súa execución. Neste caso, o suxeito é un participante activo, inmerso nun programa formativo que explora as preocupacións e necesidades de cada individuo, proporcionando unha resposta que sexa extrapolable ao seu día a día e proporcione hábitos saudables no plano cognitivo e afectivo.

O obxectivo xeral do programa “Cultiva a Mente” é promover o envellecemento cognitivo saudable e previr a deterioración cognitiva. Como obxectivos específicos destácanse promover a adhesión a un estilo de vida activo e saudable por parte das persoas maiores participantes, promover o desenvolvemento de estratexias de memoria activas, promover o coñecemento cognitivo e metacognitivo, ampliando a información sobre os procesos cognitivos e como empregalos eficazmente nas actividades da vida diaria, mellorar o axuste persoal e social das persoas participantes, aumentando a calidade de vida.

Os contidos impartidos son a promoción de hábitos saudables, envellecemento activo, promoción das relacións sociais e prevención da soidade, promoción da independencia e autonomía, conservación das capacidades cognitivas (atención, memoria, funcións executivas, percepción, orientación, linguaxe, e cálculo). A metodoloxía é activa e participativa baseada na explicación teórica de aspectos relacionados con o envellecemento activo e saudable, os procesos cognitivos, a comunicación e as relacións sociais, o adestramento en estratexias adaptativas, de cognición, memoria e comunicación, a través de exercicio grupales e dinámicas de discusión, a estimulación de funcións específicas a través de exercicios individuais, a posta en común de os aspectos abordados nas sesións e o debate, e a explicación de tarefas para casa, que se corrixen ao comezo da sesión seguinte.

Os beneficiarios do programa “Cultiva a Mente” son persoas maiores de 55 anos sen deterioración cognitiva, interesadas na prevención da deterioración cognitiva e o coñecemento do envellecemento activo.