A Xunta de Goberno da Deputación aprobou unha nova achega para o concello da Guarda, dentro da liña 1 do Plan Concellos 2018, por un valor total de 60.000 euros.

Máis polo miúdo, con esta axuda a institución provincial financiará a compra dun inmoble na rúa Ireira núm. 10 no concello da Guarda, que pasará a formar parte do patrimonio do concello. En concreto, a edificación conta cun patio anexo que favorecerá o tránsito entre as rúas Ireira e rúa do Muro. Con esta achega, A Guarda xa ten recibido 616.148,14 euros do Plan Concellos 2018, é dicir, o 45,68 % do plan provincial.

Neste senso, co Plan Concellos 2018, a Deputación de Pontevedra pon a disposición do concello un total de 1.348.813,20 euros, o que supón un 76,09 % máis que o ano pasado.

Este ano a institución provincial pon a disposición dos concellos da provincia, no marco da liña 1 do Plan Concellos, case 60 millóns de euros, distribuídos entre 28.501.200 € do Plan 2018 e o adianto de 30 millóns de euros da liña 1 do Plan 2019.