Expoñerse ao sol ten consecuencias a curto, medio e longo prazo. Ademais, leva a chamada ´memoria acumulada´: desde nenos estas horas de sol acumúlanse na pel, aumentando o envellecemento cutáneo e o risco de sufrir cancro de pel.

Que sería do verán sen gozar con amigos das terrazas ou sen tirarse horas tombados na piscina ou na praia? Coa chegada da época estival, empezan as ganas de ir quitándose capas de roupa e entran as présas por lucir un bronceado bonito para verse un máis guapo. Por iso, para non renunciar a verse mellor, hai que protexer a pel dos raios do sol empregando unha protección adecuada.

Hai que ser conscientes do que pode chegar a sufrir a epidermis a curto, medio e longo prazo. O motivo? O sol é o maior cancerígeno coñecido, mesmo máis que o tabaco. Por tanto, a protección é clave. Segundo Judit Calpe, directora médica e doutora de Medicina Familiar de mediQuo - unha app de chat médico 24 horas, os 7 días da semana, "sempre se creu que unha cara  sonrosada polo sol dá un aspecto saudable, cando en realidade ese ton avermellado ou moreno que se ve na pel despois da exposición solar é a imaxe do dano producido na nosa pel, que crea máis  pigmentos para reaccionar ante a agresión".

A exposición ao sol produce ´memoria acumulada´: desde nenos estas horas de sol acumúlanse na pel, aumentando o envellecemento cutáneo e o risco de sufrir cancro de pel. Por iso é polo que sexa tan importante protexerse ben.

Como protexerse dos raios do sol para que non afecte á pel?
Tentar minimizar a exposición ao sol, que non sexan moitas horas e evitar que sexa ao mediodía, é dicir, que non coincida coas horas centrais do día.

Utilizar cremas co factor de protección solar adecuado e resistentes á auga. Ademais, non hai que esquecer aplicalas de forma frecuente, abundante e sen esquecer ningunha parte do corpo. A Dra. Calpe, lembra que "unha boa crema solar é para reducir os efectos do sol, non para aumentar o tempo de exposición".
A protección nunca está de máis cando se vai á piscina ou á praia. Por iso, hai que levar antucas, chapeus, gorras, lentes de sol etc.

Hidratar a pel e o corpo. É fundamental aplicarse crema hidratante con protección tanto uns días antes como despois da exposición solar. Ademais, a directora médica e doutora de Medicina Familiar de mediQuo recomenda "beber moito líquido (auga se é posible) e completar a dieta con alimentos que axudan á protección como, por exemplo, a clásica cenoria, á que podemos acompañar con alimentos con vitamina C, soia, froita e hortalizas".

Coidado e precaución se se está tomando algún medicamento ou se se está embarazada: pódense crear manchas na pel polo contacto co sol.

Así mesmo, a Dra. Calpe lembra que a pel se dana tanto nun día asollado como nun día nubrado. Por iso, a protección solar ha de ser diaria, faga sol ou haxa nubes, sexa verán ou inverno. Sempre hai que protexer as partes do corpo expostas ao sol.

En definitiva, gozar das vacacións de verán e, de paso, coller algo de cor non ten por que ser nada malo, a condición de que expoñerse ao sol sexa dunha forma responsable.