A deputada de Cohesión Social e Xuventude, Digna Rivas, visitará este venres 17 de agosto o Centro de Vacacións A Lanzada para participar na segunda xornada de sensibilización e concienciación sobre as dificultades que afrontan as persoas xordocegas na súa vida cotiá. As actividades, que realizarán os 200 menores participantes no campamento “Depo Aventura A Lanzada”, están organizadas pola Organización de Persoas Xordas de Galicia (XOGA) coa que, por segundo ano consecutivo, colabora a Deputación de Pontevedra.

Esta segunda xornada tamén se desenvolverá entre as 10:00 e as 13:00 horas e basearase en dúas actividades nas que participarán as crianzas da oitava quenda do “Depo Aventura”. A primeira delas será no anfiteatro e consistirá nun baile con contidos en lingua de signos que prepararon os nenos e nenas. A segunda actividade será a “Xincana Achega-T” na que os e as rapazas e rapaces se organizarán por grupos que estarán encabezados por “deuses” que representan os cinco sentidos. Os e as participantes irán superando distintas probas relacionadas co gusto, co tacto, coa vista, co oído e co olfacto. Ademais, os e as menores adquirirán roles que lles impedirán facer tarefas cotiás como camiñar, comer etc. Finalmente, entre todos e todas farase unha análise das dificultares coas que se atoparon na actividade, de como se sentiron ou de como se pode apoiar ás persoas con diversidade funcional.

Dende a Deputación de Pontevedra considérase que o campamento “Depo Aventura A Lanzada” constitúe o marco idóneo para a realización deste tipo de actividades de concienciación. É fundamental que dende idades temperás se aborde a diversidade funcional e se fale dela de maneira aberta, sensibilizando sobre a mesma a través de dinámicas de xogo e materiais que axuden a comprendela. Ademais, dende a institución provincial considérase que este campamento serve para inculcar valores como a tolerancia ou a empatía, que sirvan para crear unha sociedade máis inclusiva e xusta para todos e para todas.

En “Depo Aventura A Lanzada” están a participar un total de 2.200 nenas e nenos, distribuídos en once quendas durante os meses de xullo e agosto, con 300 prazas gratuítas para as familias sen recursos económicos.