Esta semana asinouse nas dependencias da residencia de maiores Ballesol en Vigo o convenio de colaboración entre a empresa e o Concello de Mos mediante o que se establece a participación de Ballesol no III Programa Integrado de Emprego PIE Mos 3.0.

A sinatura foi formalizada pola alcaldesa de Mos, Nidia Arévalo, e a directora de Ballesol Vigo, Ángeles Ramírez, en presencia do concelleiro de Promoción Económica, Emprego e Novas Tecnoloxías, e responsable da Axencia de Colocación de Mos, Oscar Soto.

O convenio con esta nova empresa colaboradora enmárcase baixo o lema ‘Ballesol Vigo, destino de oportunidades’. O Grupo Ballesol quere poñer ao servizo da sociedade un modelo de negocio centrado nas persoas maiores e as súas familias e tamén na creación de emprego como xerador de riqueza económica, social e colaborativa. Desde a súa inauguración o pasado mes de marzo do presente ano, a residencia Ballesol Vigo deu continuidade e sentido a este ambicioso proxecto, co apoio tamén, de institucións como o Concello de Mos, mediante a integración da empresa no seu Programa Integral de Emprego que hoxe se formaliza coa sinatura do convenio de colaboración.

Ballesol Vigo é o terceiro centro de Grupo Ballesol en Galicia. Con 117 prazas, en cuartos dobres e individuais, garante a cobertura de necesidades e coidados entre as persoas que precisan unha atención determinada, sexan dependentes ou asistidos, pero con recursos específicos e accesibles nun novo concepto asistencial, centrado na persoa e na calidez e profesionalidade da estancia. Actualmente o centro, sito na Avda. da Gran Vía, atópase cun índice de ocupación próximo ao 80%.

Ballesol Vigo é tamén xerador de emprego estable e de calidade. E de oportunidades para un sector en continuo crecemento que busca novos profesionais nunha contorna laboral saudable, produtivo, conciliador e modélico.
A terceira edición do Programa Integrado de Emprego, PIE Mos 3.0 está a rexistrar moi bos resultados. Actualmente, conta cunha porcentanxe de inserción do 77%. Isto é, das 85 persoas participantes neste programa, o 78% (67 persoas) está traballado ou traballou ao longo do mesmo. O teceiro PIE (Programa Integrado de Emprego) Mos 3.0 comezou o 1 de decembro de 2017 e rematará o día 30 de novembro deste ano.

O Programa está subvencionado pola Consellería de Economía, Emprego e Industria da Xunta de Galicia con 159.685,84 euros e o Concello de Mos financia unha parte con 32.706,74 euros, sendo o investimento total no mesmo de 192.392,58 euros.

O Programa Integrado de Emprego do Concello de Mos ofrece orientación laboral personalizada mediante asesoramento a emprendedores/as, formación, e prácticas en empresas. No que se refire a intermediación laboral realízase a tramitación de máis de 500 ofertas tramitadas a través do Programa Integrado.

Son 36 as accións formativas que se imparten, entre presenciais e online e os participantes teñen a oportunidade de realizar prácticas en empresas, o que supón unha ferramenta para a inserción moi eficaz. Son períodos breves (2 semanas) de formación en empresa que serven para que as persoas aprendan a realizar as funcións propias do posto e demostrar valía profesional. Moi útiles en caso de querer realizar un cambio de sector ou para persoas sen experiencia laboral.

Así mesmo o Programa Integrado de Emprego do Concello de Mos conta con convenios con máis 15 empresas de distintos sectores.

O 85 % das persoas que realizan prácticas pasan a ser contratadas posteriormente nesa empresa.