Dende a concellería de Medio Ambiente, Parques e Xardíns e Revalorización de Espazos Públicos do Concello de Mos, que dirixe o edil Cándido Pérez, denúnciase o acto vandálico que causou desperfectos e inhabilitou a tirolina do Parque da Pesqueira, na parroquia de Mos.

O elemento roto do parque infantil mosense atópase agora precintado á espera de recepcionar a peza necesaria para reparala e proceder ao seu arranxo e espérase que en poucos días poida volver a estar operativo para uso e desfrute dos moitos cativos que diariamente xogan nesta área de lecer municipal.

Neste sentido o concelleiro Cándido Pérez lamentou que “se produzan este tipo de actos vandálicos cos que o único que consegue é perxudicar a tódolos veciños e veciñas de Mos en xeral e aos nenos e ás súas familias en particular, e cargar de gastos ás arcas municipais ademais de mermar a calidade de vida dos mosenses e gravar ó Concello que, ó fin e ó cabo, somos todos”. Pérez lembrou, por último, que “esta xa é a segunda vez que un acto vandálico destroza a tirolina do Parque da Pesqueira, posto que o ano pasado sucedeu o mesmo e tivo tamén que ser reparada”.