Os empregados públicos do concello de Salceda de Caselas e os distintos sindicatos,  se manifestaron no pleno celebrado no concello o venres día 26 de outubro.

Aproveitan a ocasión, para dar paso a unha amplia campaña informativa aos veciños e veciñas de Salceda, sobre a súa "precaria situación laboral na empresa de Salceda que máis e mellor exemplo de 'boa praxis laboral' debería dar..... o seu Concello" explican os empregados públicos nun comunicado.

Os traballadores do Concello de Salceda lanzan ao aire "unha serie de preguntas coas que esperamos fagan reflexionar aos veciños e ao equipo de políticos que os goberna":

• "¿Saben os veciños/as que no Concello de Salceda hai traballadores/as con 15 anos de experiencia que apenas sobrepasan os 700 € de salario?

• ¿ Saben os veciños/as que o Concello de Salceda é o único de Pontevedra que non recoñece a antigüidade aos seus empregados/as?

• ¿ Saben os veciños/as que o Concello de Salceda incumpre a Lexislación ao non dispor de ningún Convenio Colectivo e ningunha Relación de Postos de Traballo?

• ¿ Saben os veciños/as que que os Órganos de Goberno de Salceda de Caselas recibirán ao remate desta lexislatura un total de 971.231,20 € en salarios, moito máis do que cobran todos os traballadores/as laborais deste concello xuntos/as?

• ¿ Saben os veciños/as que que neste concello se levan gastado en 10 anos máis de 600.000 € en asesoramento legal, avogados, indemnizacións a traballadores, intereses e incluso multas ante a Inspección de Traballo?

• ¿ Saben os veciños/as que que neste Concello se levan gastado en 10 anos máis de 500.000 € en publicidade e propaganda, namentres se un traballador está de baixa asume persoalmente unha parte da mesma?

• ¿Saben os veciños/as que o Concello de Salceda de Caselas pasou de 6000 a 9000 habitantes en 15 anos, e que nese período a plantilla municipal pasou de 45 a 35 traballadores?

• ¿Saben os veciños/as que os operarios deste Concello non teñen taquillas, nin duchas, nin vestiarios, e que nalgúns casos se cambian a intemperie?"

Os empregados municipais rematan o comunicado explicando que "esta é a situación, a día de hoxe, en pleno século XXI, nun Concello onde parece que en política de persoal aínda non saímos do século XX".