Santiago Rodríguez Davila, voceiro do Partido Popular de Salceda de Caselas, ven de anunciar outro dos proxectos que irán plasmados no "contrato d@s populares c@s salcedenses nas próximas eleccións de maio de 2019".

O PP de Salceda leva meses facendo reunións con diferentes grupos de traballo, por iso, o seu voceiro anticipou outro dos proxectos cos que se pretende e quere mellorar o noso pobo, unha nova biblioteca municipal ubicada no edificio do actual centro de saúde.

Según manifesta Davila, “é coñecido o ruído que hai na actual Biblioteca para estudar, ler, concentrarse…, a nula insonorización da sala de estudo, engadindo a mala ubicación da mesma (praza do Concello) polo feito de que case todos os actos do noso pobo se celebran alí mesmo, o que fan case imposible ter un entorno tranquilo,sen ruidos e axeitado para o estudo, a lectura e a concentración precisa para elo”.

Os voceiro sinalou tamén que, “esta proposta de executar unha Gran Biblioteca Municipal no actual edificio do Centro de Saúde é precisa, e así o reclaman @s usuari@s a través das queixas respeto da actual situación; desta forma conseguiríamos que a biblioteca estivese nun edificio ben situado, en zona moito máis   tranquila, accesible e amplo, onde gañaremos ampliamente en espazos, calidade e sobre todo, en luminosidade, do que carecemos agora. Unha gran obra para un gran pobo” afirma o voceiro popular.