Un home resultou ferido despois de envorcar o vehículo que conducía ao seu paso pola localidade pontevedresa de Salvaterra de Miño. Ademais, o condutor e, único ocupante, tivo que ser excarcerado polos Bombeiros de Ponteareas, tras quedar atrapado no interior do turismo.

Ao fío das 00:30 horas desta madrugada, unha persoa particular alertaba ao 112 Galicia dun coche envorcado á altura do punto quilométrico 287 da A-52,  dirección Ourense. Indicaba, ademais, que a persoa podía estar atrapada no seu interior.

A partir de aí, os xestores do 112 alertaron axiña ao 061-Urxencias Sanitarias, aos Bombeiros do Porriño e de Ponteareas. Tamén,  os axentes de Tráfico se desprazaron ao punto nada mais ser requiridos polo 112 Galicia.

Unha vez liberado, o condutor foi evacuado polos servizos sanitarios de urxencia ao centro hospitalario de referencia.