Hyundai Motor adiántase ao futuro presentando unha tecnoloxía propia capaz de recargar os vehículos eléctricos utilizando a luz solar. Utiliza paneis solares xeradores de electricidade instalados no teito ou no  capó dos vehículos.

Con este desenvolvemento,  Hyundai demostra a súa capacidade de innovación no campo da mobilidade sustentable, onde xa conseguiu algúns dos fitos máis importantes da industria. Despois de lanzar o primeiro modelo con tres modos de propulsión electrificada nunha única plataforma, o Hyundai  IONIQ, e de facer o propio co vehículo de pila de combustible de hidróxeno máis avanzado do mercado, o Hyundai NEXO, agora a compañía anuncia un sistema de carga solar viable para entrar en produción nun futuro próximo. Esta tecnoloxía de paneis solares, ademais de incrementar a autonomía dos vehículos eléctricos ou híbridos  enchufables, tamén será compatible cos modelos de combustión interna para mellorar a súa eficiencia.

Na actualidade, Hyundai Motor Group está a desenvolver tres tipos de sistemas de carga mediante paneis solares. O teito solar de primeira xeración aplicarase aos modelos híbridos e conseguirá cargar entre o 30 e o 60% da batería ao día, segundo as condicións climáticas e do ambiente. Esta tecnoloxía utiliza unha estrutura de paneis solares de silicio producidos en serie instalable en calquera tipo de teito.