O Partido Socialista de Ponteareas celebrará o acto de presentación de Chus Garrote como candidata o vindeiro domingo 2 de decembro, onde ademais se darán a coñecer as primeiras propostas para os vindeiros 4 anos de goberno.

Garrote, quen foi nomeada o pasado mes de xaneiro co voto unánime da militancia Secretaria Xeral da Agrupación Municipal, conta con todo o respaldo e apoio do partido para liderar a lista que consolidará o cambio progresista en Ponteareas.

A este acto de proclamación asistirán o recentemente nomeado candidato á Presidencia da Xunta de Galicia, Gonzalo Caballero, a Presidenta da Deputación de Pontevedra, Carmela Silva, e o Secretario Xeral provincial, David Regades.

“Hai catro anos presenteime para que a corrupción abandonase as institucións de Ponteareas e se restituísen as políticas da dignidade e do progreso que nos demandaba a veciñanza. Hoxe Ponteareas é unha cidade con futuro”, manifesta a tenente de alcalde e candidata socialista Chus Garrote.

As e os socialistas de Ponteareas sinalan que encaran as vindeiras eleccións con máis dun 85% do seu programa electoral xa cumprido, o que para os socialistas é unha garantía para que toda a cidadanía de Ponteareas volva confiar na candidatura do PSdeG-PSOE.