O comité executivo do Consorcio Casco Vello de Vigo (CCVV) vén de autorizar o inicio do proceso de venta das promocións das rúas Ferrería 8 e Cruz Verde 8, na zona alta do barrio histórico. Así o informou o presidente do ente e delegado da Xunta, Ignacio López-Chaves, quen sinalou que ambas propostas foron xa remitidas ao Instituto Galego de Vivenda e Solo (IGVS) para a selección de adxudicatarios.

Estas construcións responden á demanda de vivendas de maior superficie, tal e como adiantara o presidente do CCVV, que hoxe volveu a facer fincapé en que o obxectivo é “facilitar a incorporación de familias ao casco vello vigués”. Cunha inversión conxunta superior aos 370.000 euros, superan os 110 metros cadrados distribuídos en tres plantas e atópanse na fase final da súa construción, de modo que a adxudicación poderá ser efectiva no primeiro trimestre do 2019.

As propostas que se presentarán ante o IGVS, organismo responsable do proceso de adxudicación destas dúas promocións, recolle como prezos propostos de venda 200.000 euros no caso de Ferrería 8 e de 212.225,60 no de Cruz Verde 8.

Todos os interesados en participar neste proceso deberán estar inscritos no Rexistro Único de Demandantes de Vivendas e cumprir os requisitos fixados na convocatoria para as Vivendas de Protección Autonómica para Venda en Réxime Concertado que poden consultarse na web do IGVS a través da seguinte ligazón: https://goo.gl/pLUwbr

Segundo detallou López-Chaves, a edificación de Cruz Verde 8 permitiu a creación dunha vivenda unifamiliar de tres dormitorios distribuída en planta baixa e tres pisos, que conta tamén cun pequeno patio posterior cara ao que se orientan as zonas de servizo. A planta baixa é unha área de apoio para a vivenda e alberga, ademais do espazo propio para o recibidor e o oco da escaleira, un despacho e un pequeno almacén. Trátase da segunda promoción do CCVV nesta rúa.

En canto a Ferrería 8, distribúese en planta semisoto, planta primeira e planta segunda baixo cuberta. Consta de dous dormitorios, de aproximadamente 11 e 15 metros cadrados, dous aseos, un baño, un estudo e un lavadoiro. A superficie construída total é de 178,84 metros cadrados, dos cales 111,35 son útiles. O edificio ten tres fachadas, abertas ás rúas Ferrería e Baixada a Herba e supón o sétimo dos inmobles rehabilitados polo ente nesta rúa.  

Recuperación da fachada marítima
Ao fío, López-Chaves recordou que o último comité executivo do Consorcio Casco Vello deu luz verde a maior operación de compra deste 2018 coa adquisición por un importe de 445.000 euros de Ribeira do Berbés 29. Segundo dixo, grazas a esta compra poderán construírse sete novas vivendas e dous locais comerciais.

Tal e como sinalou, a recuperación da fachada marítima do barrio histórico concentra agora o maior esforzo inversor do organismo, e esta última adquisición eleva a oito as edificacións en propiedade do Consorcio xunto a Berbés 11,13 e 15, cedidos á Universidade de Vigo para a construción da súa sede; Berbés 5, en réxime de cesión á Axencia Galega de Turismo para a súa conversión en albergue de peregrinos, e Berbés 7 e 41.

López-Chaves, quen exemplificou no traballo do Consorcio Casco Vello de Vigo, participado nun 90 por cento pola Xunta de Galicia e nun 10 polo Concello, a política de rehabilitación que promove a Xunta nos cascos históricos das vilas e cidades galegas, cifrou en máis de 40 millóns de euros o investimento na rehabilitación do barrio histórico vigués. Grazas a estes investimentos, o ente xa adquiriu case 80 inmobles -dos 232 catalogados en estado deficiente- e máis de 60 xa se rehabilitaron ou estase a traballar neles.

En resumo, grazas aos edificios xa rehabilitados obtivéronse 32 locais comerciais, cos que se pretende dinamizar a vida económica desta zona de Vigo, e 105 vivendas protexidas polo que o prezo das mesmas, tanto en réxime de alugueiro como de compra, son limitados. Os inquilinos abonan entre 5 e 7 euros ao mes por m2; cando o prezo de venda parte dos 1.550 por m2 e ata un máximo de 1.773.