A presidenta da Deputación de Pontevedra, Carmela Silva, daba o pasado día 3 lectura do Bando da Constitución Española nos salóns do Museo de Arte Contemporáneo (MARCO), en Vigo, no acto conmemorativo que tradicionalmente organiza o Concello polo Día da Constitución. Silva, que titulou á súa intervención "Unha Constitución para todas", centrouse nos cambios positivos que fai 40 anos a Carta Magna trouxo consigo e que dotaron dun marco que permitiu avanzar ao conxunto da sociedade e, en particular, nas garantías e dereitos que ofreceu ás mulleres.

"Neste corenta aniversario temos que sentirnos enormemente satisfeitas e satisfeitos do que significou a democracia e a Constitución", asegurou a presidenta que a cualificou como "un sopro de aire fresco que encheu á cidadanía que habita no Estado español de garantías e dereitos, e particularmente ás mulleres". "Á democracia séntalle ben a igualdade, dixo a presidenta provincial, e grazas á Constitución conseguimos un marco normativo para reclamar os dereitos que durante a ditadura nos foran usurpados".

Sen embargo, Carmela Silva tamén fixo fincapé en que as leis "aínda non desenvolveron as garantías suficientes para que os dereitos que recolle a Constitución sexan reais". Por estes motivos, instou a reflexionar a todas e a todos e, no eido dunha futura reforma constitucional, avogou por tomar decisións que reforzan cuestións que afectan ás mulleres, como incorporar a linguaxe inclusiva ao texto ou contemplar con maior contundencia e claridade os instrumentos para acadar a plena igualdade.

De feito, Silva comezou a súa intervención destacando os artigos 9 e 14 da Constitución como base do desenvolvemento de leis como a Lei de Igualdade efectiva de mulleres e homes que tivo que agardar 29 anos, ata o 2007, para facerse realidade. Artigos que, unidos ao 53, tamén fundamentan que as administracións públicas deben apoiar e impulsar políticas públicas encamiñadas a garantir a liberdade e a igualdade. A presidenta da Deputación tamén fixo referencia ao dereito á dignidade e libre desenvolvemento da personalidade así como o dereito á vida, á honra, intimidade persoal e familiar e á propia imaxe, recollidos nos artigos 10, 15 e 18. Neste eido, Silva referiuse a que moitas mulleres non poden desenvolver a súa personalidade con liberdade e moitas son asasinadas por mor do machismo. Por estes motivos, a presidenta reivindicou que a problemática das violencias machistas sexa unha cuestión de Estado.

Tamén recordou que a Constitución, a través do artigo 22, abriu o paso á organización de mulleres en asociación para a súa defensa e os seus dereitos. Do mesmo xeito que, tal e como recolle o artigo 23, comezou a impulsarse a participación feminina nos asuntos públicos e cargos públicos. Así, Silva recordou que "pasamos de ser o 5,4 % dos escanos no Congreso e o 2,25 % no Senado da lexislatura constituínte ao 39,4 % no Congreso e o 39,9 % no Senado na actual". Tamén recordou que desde 1936, cando Federica Montseny se convertía na primeira muller ministra en España, houbo que esperar ata 1981 para ver a outra muller ocupar o mesmo posto.

Ademais, a Constitución Española, segundo manifestou a presidenta da Deputación, abriu as portas á educación e á formación universitaria. De feito, Silva referiuse ao aumento da porcentaxe de mulleres graduadas pola universidade que pasou do 14,5 % no 1950 ao 58 % na actualidade. Outros artigos recordados por Carmela Silva son os 32 e 33. Ao respecto, a presidenta destacou que "grazas á Constitución as mulleres convertémonos en seres independentes e con dereitos individuais que, se ben hoxe son incuestionables, antes de 1978 convertían ás mulleres en seres supeditados aos homes en canto contraían matrimonio, ata o punto de perder o dereito á súa propia herdanza".

Finalmente Silva tamén se detivo no dereito ao traballo e na protección da saúde, que determinaron un cambio considerable para as mulleres desde a aprobación da Constitución. "Somos o 45 % da forza laboral en España pero o certo é que, a pesar de ser o 58 % das persoas que se gradúan na universidade, seguimos a ter unha fenda salarial do 21 % en Galicia". Xa en canto á saúde, Silva destacou que grazas á Constitución se universalizou a sanidade e avanzouse en aspectos que afectan directamente ás mulleres, "aínda que, a día de hoxe, moitas enfermidades que padecen as mulleres non son recoñecidas".