Abel Caballero informou este xoves do recente premio gañado pola Biblioteca Municipal Neira Vilas. A dotación cultural viguesa recibiu o galardón ao mellor vídeo do IX Congreso Nacional de Bibliotecas Públicas pola peza "Reflexións", na categoría de concellos de máis de 100.000 habitantes.

A Biblioteca Municipal Neira Vilas gañou este mes de novembro o premio ao mellor vídeo no IX Congreso Nacional de Bibliotecas Públicas pola peza "Reflexións". O alcalde, Abel Caballero, explicou en rolda de prensa que a cita ven de celebrarse en Logroño e que o vídeo galardoado foi obra de Fon Cortizo.

O congreso tivo este ano como temática "Bibliotecas públicas: profesionales para todos los públicos" e puxo o acento "na reflexión sobre as persoas que traballan e as que participan nas bibliotecas: a preparación necesaria dos bibliotecarios; os modelos e fórmulas para xestionar con eficacia e éxito os equipos de a bibliotecas, e as súas formas de conectar da mellor maneira coa comunidade, e en particular con colectivos especiais e específicos".

Cada biblioteca podía participar cun único vídeo, que debía ser inédito e ter unha duración máxima de 3 minutos, dentro das categorías de bibliotecas en poboacións de menos de 5.000 habitantes, bibliotecas en poboacións entre 5.000 e 100.000 habitantes e bibliotecas en poboacións de máis de 100.000 habitantes, na que participou a BPM Xosé Neira Vilas.