A presidenta da Deputación de Pontevedra, Carmela Silva, trasladou esta mañá as condolencias do goberno da institución provincial ás familias, amigas e amigos tanto dos mariñeiros de Cambados falecidos no naufraxio do “Sin Querer 2”, como do falecido no sinistro en Malpica.  Desde esta mañá as bandeiras da Deputación ondean a media hasta en sinal de respecto e dó polas vítimas de ambos os dous accidentes.

Silva, que transmitiu persoalmente a súa dor á alcaldesa de Cambados, decidiu cancelar a súa axenda oficial tras gardar un minuto de silencio en Soutomaior onde as autoridades non participaron, en sinal de dó, no acto de inauguración dunha exposición. “Creo que neste momento toda a provincia de Pontevedra quere estar ao lado da dor das familias, amigas e amigos dos mariñeiros de Cambados e de Malpica. De verdade que o sentimos moitísimo”.

A presidenta trasladou “un abrazo moi grande” ás familias afectadas pola traxedia do patrón do “Sin querer 2”, Manuel Serén, e dos mariñeiros da mesma embarcación, Teófilo Rodríguez e Bernardo Padín, os tres de Cambados, así como a de José Ángel Sanjurjo, falecido no accidente de Malpica, “todas as nosas condolencias e cariño do goberno provincial”. Silva informou que “estamos neste momento á espera de coñecer cando son trasladados a Cambados para poder ir a darlles o noso agarimo persoalmente e compartir a súa dor, aínda que somos moi conscientes de que non hai ninguén, nin nada que poida facer fronte a unha perda tan terrible, nun accidente tan terrible”.

Mañá venres a presidenta provincial visitará a capela ardente situada no Pavillón do Pombal, en Cambados.