O sábado 29 de decembro ás 19:00 horas terá lugar no auditorio do Centro Cultural de Xinzo o concerto de Fin de Ano da Banda de Música de Xuvenil de Xinzo. Nesta ocasión, contarase tamén coa Coral Cantares de Xinzo e a Coral Xuntanza de Covelo, que cantarán conxuntamente.

O concerto titúlase “Cores de Nadal” , en referencia ás pezas musicais interpretadas, cuxos títulos se corresponden con nomes de cores.

A primeira parte de concerto estará interpretada de forma exclusiva pola Coral Cantares de Xinzo en colaboración coa Coral Xuntanza de Covelo. Unha fusión vocal que porá enriba do esceario a máis de 50 persoas para o deleite de todo o público presente. Este concerto servirá tamén para a presentación pública dos novos membros da Coral Cantares de Xinzo.

Posteriormente será a quenda da Banda de Música Xuvenil de Xinzo, que ofrecerá un programa de alta dificultade técnica, no que se poderá escoitar unha obra para trombón solista e banda. O papel solista será interpretado por Javier Otero, trombón da Banda de Xinzo que actualmente está rematando os seus estudos de Grado Profesional no Conservatorio Municipal de Ponteareas.

Rematará o concerto cunha fusión entre as 3 agrupacións (Coral cantares de Xinzo, Coral Xuntanza de Covelo e Banda de Música Xuvenil de Xinzo), que permitirá ver enriba do escenario do Centro Cultural de Xinzo, a 100 persoas baixo a batuta do mestre Javier Blanco.

Dende a Xunta Directiva da Banda de Música de Xinzo, queren agradecer a colaboración de todos os socios, administracións públicas, e demais persoas, que fixeron en fan posible cerrar un 2018 cheo de éxitos para a Asociación. En verbas do Presidente, “pechamos un ano no que levamos a cabo unha intensa actividade en todas as seccións da Asociación (Escola de Música, Banda, Coral, etc.), que fixeron consolidar o crecemento constatado durante o pasado ano. O que nos permitirá, a falta de pechar os últimos detalles, ter un proxecto moi ambicioso para o vindeiro 2019, gracias ao deseño do presuposto mais alto da nosa historia”.