A tenente de alcalde de Ponteareas Chus Garrote, vén de reafirmar "o seu compromiso cos veciños e veciñas de Ponteareas" e especialmente coa plataforma de afectados pola N-120 para que "se executen o antes posible as obras da variante que leva tantos anos esperando a vila do Tea".

Para o Partido Socialista de Ponteareas, "o Estado ten unha débeda histórica co Concello de Ponteareas e coas parroquias de Xinzo, Arnoso e Areas así como cos seus veciñas e veciñas". “Os consecutivos gobernos de PP e ACIP xamais defenderon unha saídas e entradas por estrada dignas para Ponteareas cando se realizou a A-52” sinala Chus Garrote.

Ante isto, Chus Garrote considera necesario que "a Xunta asuma canto antes a súa responsabilidade para a redacción do proxecto, sen o cal non se coñecerán os custes reais nin do proxecto nin se poderán executar as obras da variante".

Neste senso a líder socialista recorda que "no 2017 foi precisamente a Xunta de Galicia quen presentou un primeiro borrador de convenio por un importe de 7 millóns de euros do cal o goberno de Mariano Rajoy se desentendeu". “O Partido Popular, xa desde a Xunta como desde o goberno de España, sempre buscou un parapeto para paralizar as obras da circunvalación” afirma Chus Garrote.