A empresa especializada en xestións bancarias de empresas e organizacións, Besepa, foi adquirida por Enxendra Technologies. O acordo de compra oficializouse nos últimos días e xa se está procedendo á integración de ámbolos dous negocios.

Besepa, empresa participada por inversores de referencia no sector TIC como Cabiedes & Partners e François Derbaix, pasa a integrarse en Enxendra, empresa con sede na Coruña e Madrid que desenvolveu o produto Docuten, unha plataforma de facturación e firma electrónica, que usan grandes empresas como Desigual ou o Grupo Planeta para dixitalizar o intercambio de documentos, tales como contratos laborais, mercantís e o proceso de facturación.

A solución de pago de Besepa integrarase cos servizos de ​Docuten, a primeira plataforma do mercado que ofrece conxuntamente firma dixital e factura electrónica.​ Como afirma o CEO de Enxendra Technologies, Brais Méndez, “Grazas á compra de Besepa afondamos na diferenciación de Docuten, cubrindo as necesidades de dixitalización de todo o ciclo de negocio das organizacións. Os clientes pedíannos en moitas ocasións estes servizos. E, certamente, é natural debido á estreita relación que existe entre a facturación e os pagos. Agora poderemos prestar servizos propios dunha entidade de pagos.”

Deste xeito refórzase o obxectivo principal da compañía, crear solucións que faciliten o fluxo e automatización de todo o ciclo de documentos de negocio: contratos laborais, contratos mercantís, envío e recepción de facturas, e agora cobros e pago.

Esta adquisición tamén reforza un dos focos estratéxicos máis importantes para Enxendra Technologies para o ano 2019: a consolidación internacional do seu produto Docuten, “que se verá axilizada grazas a este novo servizo”, segundo o CEO da compañía. "Ata a data crecemos empregando unicamente recursos propios", apunta Brais Méndez. "Sen embargo, e de cara á expansión internacional da compañía, non descartamos nos vindeiros meses buscar aliados que nos permitan afrontar o proceso de internacionalización con maiores garantías".

A transformación dixital é o ​core indiscutible de ámbalas d compañías e é por isto que Alberto Molpeceres, CoFundador de Besepa, non dubida en explicar que “o que nos atraeu de Enxendra é que a súa proposta de valor está moi ligada ao núcleo do noso negocio. A integración de ambas corporacións aportará un valor engadido moi potente aos nosos clientes”. ​Alberto seguirá vinculado ao proxecto como ​Payment Product Manager.​