Nesta terceira entrega de “Hoxe con Manquiña” viaxarán ata Meis (Pontevedra), onde lles abre as portas do Pazo familiar onde reside cando viaxa a Galicia un home pertencente a unha das sagas familiares máis importantes do panorama galego, Pío Cabanillas Alonso.

Coñeceremos a faciana máis descoñecida daquel que fora director xeral de RTVE e portavoz do goberno de Aznar do 2000 ao 2002. Descubriremos da man do noso presentador, Manuel Manquiña algunhas das súas grandes paixóns: o kárate, o alpinismo e por riba de todo, a fotografía. De feito é xa un fotógrafo de paisaxes altamente recoñecido.

Independencia, curiosidade, risco e unha pizca de loucura son os acicates que segundo o noso convidado se necesitan para retratar grandes desertos e lugares remotos.

Hoxe con Manquiña
En “Hoxe con Manquiña” terán a oportunidade de continuar a coñecer a faciana máis íntima e persoal dos nosos galegos e galegas máis famosos e recoñecidos. Neste novo espazo de Televisión de Galicia, ademais de indagar nos aspectos menos coñecidos dos nosos convidados,  teremos tamén a ocasión de descubrir o seu punto de vista sobre fitos do pasado que viviron en primeira persoa e, como non, tamén da actualidade.

Ademais achegaranse á xente da rúa para tratar de averiguar o que saben sobre os nosos convidados e contaremos cunha sección sorpresa para o entrevistado na que recibirán unha mensaxe de alguén moi especial e querido para cada un deles.