"Nigrán estivo máis de dous anos co sonómetro sen calibrar, entre o 2 de setembro de 2016 e o 2 de outubro de 2018, polo que durante este período de tempo non se puido realizar ningún control da contaminación acústica xerada por múltiples actividades, que resultan molestas para a veciñanza" segundo explican dende Nigrán Decide.

"Ante as numerosas queixas polas molestias que estaba causando o alto nivel de ruído xerado por determinadas actividades, algunhas delas promovidas polo goberno municipal ou algúns dos seus membros" explican dende  NIGRÁN DECIDE quen solicitou diversa documentación, entre a que estaba o certificado de calibración do sonómetro municipal.

"Na documentación facilitada o 10 de outubro de 2018, máis de un mes despois de realizar a solicitude, sinalábase que o sonómetro fora calibrado o día 2 de outubro de 2018, indicándose na súa remisión que non se enviara antes por estar o sonómetro en fase de verificación" segundo denuncian.

"O Alcalde negouse a contestar no Pleno de novembro á pregunta de NIGRÁN DECIDE, sobre a data de calibración do sonómetro do concello, para despois facilitar información errónea no Pleno de decembro da corporación de Nigrán" explican.

"Esta situación fixo pensar ao noso grupo municipal que o sonómetro enviouse a calibrar despois da nosa solicitude de información, polo que rexistramos o 18 de novembro, 11 días antes da celebración do Pleno dese mes, unha pregunta por escrito para coñecer a data da anterior calibración anterior á realizada ao do mes de outubro do ano 2018" aclaran.

"No Pleno de novembro, a pesar de existir a obriga de contestar as preguntas formuladas por escrito con máis de 24 horas de antelación, o alcalde negouse a contestar a pregunta, que reiteramos no Pleno de decembro. Neste Pleno, o alcalde contestou que a anterior calibración fora o 24 de setembro de 2018" aseguran.

Ante esta resposta, e dado que os períodos de validez destas verificacións son dun ano, "o noso grupo municipal solicitou esa certificación, confirmándose na documentación recibida que a anterior calibración era válida até o 2 de setembro de 2016. Polo tanto, entre esa data e o 2 de outubro de 2018 o sonómetro do concello estivo sen calibrar".

"Non cabe a posibilidade dun erro na contestación, pois na súa resposta non coincide nin día, nin ano, polo que, como aconteceu noutras ocasións, o alcalde volveu tratar de enganar ao máximo órgano de representación da veciñanza de Nigrán, que é o Pleno", sinala José Cuevas, voceiro de Nigrán Decide, para continuar indicando que "con estas actitudes, ponse de manifesto a baixa calidade democrática deste goberno", finaliza Cuevas.