A Concellería de Emerxencias do Concello da Guarda pecha dende a tarde deste xoves, día 31 de xaneiro, o acceso ao vial portuario comprendido entre a Atalaia e o Monumento ao Mariñeiro Desaparecido, un vial empregado recentemente como vial alternativo polas obras da Rúa Concepción Arenal.

Esta decisión tomouse ante a inminente activación dunha Alerta Vermella por situación meteorolóxica desfavorable que imposibilita a circulación por este vial ao carón do Porto. En función da mellora da situación meteorolóxica habilitarase novamente a circulación por este vial nos vindeiros días.

Todos os veciños e veciñas que o desexen poden seguir empregando os viais alternativos para baixar ao Porto pola Rúa Ireira e pola zona da Depuradora.

Recórdase de igual xeito que ante o Aviso Vermello é preciso evitar as zonas próximas ao litoral, diques, praias, rompentes ou cantís.