O luns, día 4 de febreiro, 5 persoas usuarias do centro de recursos que a Confederación Galega de Persoas con Discapacidade (COGAMI) ten en Mos (Avenida do Rebullón, s/n Puxeiros) entrarán no centro coa maleta feita. Estas 5 persoas van ser, durante 2 meses e medio, as primeiras inquilinas dunha vivenda totalmente adaptada e que está situada ao carón das instalacións do centro de recursos que a Confederación ten en Mos.

Denominado Independízate, á inauguración do proxecto asistirán o vicepresidente de COGAMI, Ramón Sestayo, o director do centro de Mos, Celso Álvarez, quen van ser acompañados pola alcaldesa de Mos, Nadia Arévalo, a concelleira Benestar de Mos, Sara Cebreiro, e o director da oficina “la Caixa” de Mos, Ricardo Otero, entidade financeira que apoia este proxecto.

Co inicio do proxecto, COGAMI pretende mellorar a calidade de vida e, sobre todo a autonomía das persoas con discapacidade física. O obxectivo é adestrar a 15 persoas en habilidades para a vida autónoma, polo tanto, as persoas participantes terán a oportunidade de convivir nun espazo adaptado e terán a disposición persoal de apoio que lles acompañará no seu proceso de aprendizaxe e adestramento. A posta en funcionamento deste servizo será un recurso de vivenda tutelada para persoas con algún grao de dependencia e que precisen nun futuro deste tipo de servizo.