Desde este luns, 4 de febreiro, e ata o día 22, as entidades de maiores, pensionistas e persoas xubiladas da provincia que desexen sumarse a “Depo en  Marcha 2019” poderán presentar a súa solicitude por vía telemática para participar neste programa de envellecemento activo que impulsa a institución provincial. En total, este ano a Deputación de Pontevedra oferta 130 obradoiros de 30 horas dirixidos á terceira idade.

A institución provincial destina neste 2019 156.000 euros para o programa “Depo en Marcha”. Son 36.000 euros máis que na edición do 2018 co obxectivo de poder incrementar o número de obradoiros a realizar. Inicialmente serán 130 os obradoiros ofertados que se aumentarán en función do número de solicitudes presentadas polas entidades de persoas maiores, xubiladas e pensionistas da provincia de Pontevedra. Todos eles, de 30 horas de duración, agrúpanse en oito grandes áreas: “Traballando coas mans”, “Entre fogóns”, “Aprendendo da natureza”, “Móvete”, “Activando corpo e mente”, “Enredando”, “Dálle marcha” e “En rede”.

Os principais obxectivos do programa “Depo en marcha”, impulsado polo goberno de Carmela Silva, son favorecer o envellecemento activo, optimizar as oportunidades de saúde, participación e seguridade, mellorar a calidade de vida das persoas maiores, establecer relacións sociais e favorecer a participación en actividades que melloren o seu estado anímico, así como potenciar movementos de participación e cooperación social, promover espazos de encontro e impulsar a independencia das e dos maiores para evitar o illamento e as situacións de soidade.